- टीम बाईमाणूस
“पूर्वी माझ्याकडून चूक झाली, हे मी मान्य करते. पण तेव्हापासून माझा पदर नीट असतो, मी केस मोकळे सोडत नाही. मी काही अश्लील डान्स करत नाही. त्यामुळे आता माझ्या कार्यक्रमांबद्दल आक्षेप घेण्याचं काहीच कारण नाही”, अशी प्रतिक्रिया इंस्टा आणि लावणी क्वीन गौतमी पाटीलने व्यक्त केली आहे.
इंस्टा क्वीन, लावणी क्वीन गौतमी पाटीलवरून राज्याच्या सांस्कृतिक विश्वात उडालेला धुरळा अद्याप विसावण्याची चिन्हे दिसत नाहीये. लावणी कलाकार गौतमी पाटील म्हणजे सोशल मीडियावरील एक लोकप्रिय चेहरा. तिचे अनेक व्हिडिओ, इंस्टाग्राम रिल्स तसंच इतर सोशल मीडिया प्लॅटफॉर्मवर व्हायरल होत असतात. ‘सरकार’, ‘आणा की शेठ’ या गाण्यांनी गौतमीने चाहत्यांना वेड लावले आहे. अश्लीलतेचे प्रदर्शन करत असल्याच्या वादावरुन गौतमीच्या कार्यक्रमांवर बंदी घालण्याची मागणी अनेक ठिकाणी होत आहे. एका बाजूला तिचा डान्स पाहण्यासाठी गर्दी होतेय. तर दुसऱ्या बाजूला गौतमी पाटील तिच्या डान्समधून अश्लीलता पसरवतेय त्यामुळे तिच्या डान्सवर बंदी घालण्यात यावी, अशी मागणी समाजातील एका वर्गाकडून, संस्थाकडून करण्यात येत आहे. सध्या सुरु असलेल्या या सर्वच प्रकाराबाबत गौतमीला काय वाटतं हे तिने मनमोकळेपणाने TV9 मराठीला दिलेल्या विशेष मुलाखतीत सांगितलंय.
संबंधित वृत्त :
- लावणी नृत्यांगना गौतमी पाटीलने केलंय मार्केट जाम…
- अश्लील लावणी पाहून ज्येष्ठ लावणी नृत्यांगना संतापल्या
प्रश्न: कार्यक्रमावर बंदी घालण्याबाबतच्या मागणीबद्दल काय वाटतं?
गौतमी : ”कार्यक्रमावर बंदी घालण्याची मागणी करणाऱ्यांनाच याचं कारण माहित असेल. मला वाटत नाही की माझ्या कार्यक्रमावर बंदी घालावी. मी कुठेही चुकत नाही, चुकले तर मला तुम्ही सांगा असं मला वाटतं. मागे जे झालं ते झालं. त्यानंतर मी कुठेही चुकलेले नाही. तुम्ही माझे अजूनही व्हिडिओ बघू शकता. सध्या मी सर्व व्यवस्थित करतेय. त्यामुळे बंदी घालावी असं मला वाटत नाही”.
प्रश्न: लावणीत अश्लीलतेच्या आरोपाबाबत काय वाटतं?
गौतमी : “आता अश्लील काहीच नाहीये. मागं जे झालं ते झालं. त्यांना कुठं अश्लील दिसतं काय माहिती. बोलणाऱ्यांनाच माहिती की, कार्यक्रमात अश्लीलता कुठे आहे ती. अश्लील काहीच सुरु नाही. सर्व व्यवस्थित कार्यक्रम सुरु आहे. मी आणि माझ्यासोबतच्या मुलीही छान डान्स करतात. अश्लील हावभाव करत नाही. पण लोकांना काय दिसतंय काय माहित. मी तर म्हणतेय कुठे दिसतंय? मला व्हिडिओ दाखवा की अमूक अमूक ठिकाणी चुकीचं वागलीय”..
प्रश्न: कार्यक्रमाला नक्की विरोध का होतोय?
गौतमी : “विरोधाचं कारण त्यांनाच माहिती, काय कारण असंल. आता त्यांच्या मनात काय आहे,”
प्रश्न: तुमच्यामुळे प्रस्थापित अभिनेत्रींच्या कार्यक्रमावर परिणाम झालाय याबाबत काय वाटतं?
गौतमी : “माझ्यामुळे कुणाचे कार्यक्रम थांबले असतील असं मला तरी वाटत नाही. मला नाही वाटत की माझ्यामुळे कुणाचं काही थांबलं असेल. ज्याची त्याची चॉइस असते की आज हा कार्यक्रम ठेवायचाय. लोकांना वाटतं माझा कार्यक्रम ठेवायचाय तर माझा कार्यक्रम ठेवतात. लोकांना वाटलं की आज गौतमी पाटीलचा कार्यक्रम नको, तर लोकं दुसरा कुणाचा कार्यक्रम ठेवतील. ज्याची त्याची चॉईस आहे. त्यानुसार तो कार्यक्रम ठेवतो”.
प्रश्न: सोशल मीडियावर विरोधासह समर्थनाबाबत काय वाटतं?
गौतमी : “प्रेक्षकांचं माझ्यावर प्रेम आहे, त्यामुळेच ते मला सपोर्ट करतायेत. प्रेक्षकांनी असंच प्रेम माझ्यावर राहु द्यावं. माझ्यावर प्रेम करणाऱ्यांना मी धन्यवाद देते. ते प्रेम आहे त्यांचं, म्हणून ते मला सपोर्ट करतायेत”.
प्रश्न: तुमच्या कार्यक्रमाला मिळणाऱ्या प्रतिसादाचं कारण काय?
गौतमी : “लोकांना डान्स आवडतो, मी आवडते. त्यामुळे प्रेक्षकवर्ग कार्यक्रम पाहायला येतात. मोठ्या संख्येने गर्दी होते. बाकी काही नाही”.
प्रश्न: ‘महाराष्ट्राची सपना चौधरी’ या उपमेबाबत काय?
गौतमी : “ज्याचे त्याचे विचार आहेत. सपना ताईचंही खूप नाव आहे. तिच्यासोबत माझं नाव घेतलं जातं म्हणजे मला तसं म्हटलं जातं म्हणून छान वाटतं. ताईचं नाव काय साधं नाहीये, मला छान वाटतं”.
प्रश्न: लावणीसम्राज्ञींच्या आक्षेपाबाबत काय?
गौतमी : “त्यांचं काही चुकीचं नाही. मी नाही म्हणणार की त्या चुकतायेत. त्यांचं पण बरोबर होतं. मला वरिष्ठ असलेल्यांचं काही चुकीचं नाही. कारण माझ्याकडून तशी चूक झालीच होती. अजूनही माफी मागते. मी चुकले होते, हे मान्य करते. त्यावेळेस काही चुकलं असेल तर आताही माफी मागते. मी खरंच चुकले होते म्हणून त्या मला बोलल्या होत्या. त्यानंतर मला समजावूनही सांगितलं. त्यामुळे त्यांचं बरोबर आहे. पण आता मला वाटतंय की मी कुठे चूकत नाहीये. कारण सर्व कार्यक्रम व्यवस्थित चाललेत. कार्यक्रमात अश्लील हावभाव किंवा अश्वील काहीच नाहीये”.
प्रश्न: गौतमीची पार्श्वभूमी काय?
गौतमी : मी आधी धुडे सिंदखेडा गावाकडे होते. तिथे मी आजोबांसोबत (आईचे वडील) राहिले. माझे वडील लहानपणापासून सोबतच नाहीत. आई आणि मी आजोबांसोबतच राहिले. त्यांनीच मला सांभाळलं. मामाने आईचा संसार व्हावा यासाठी वडिलांना आणि आम्हा दोघांना अस तिघांना पुण्याला आणलं. पण वडील व्यवस्थित राहिले नाहीत. ते ड्रिंक करायचे. त्यामुळे त्यांना परत पाठवलं. मग परत आम्ही दोघंच राहू लागलो. आईने जॉब केला. मात्र आईचा पीएमटीमध्ये अपघात झाला. त्यानंतर मी या क्षेत्रात आले.
प्रश्न: पुढची वाटचाल कशी असणार?
गौतमी : “आता कार्यक्रम तर आहेतच. साँग, सिनेमाचं काम मिळालं तर नक्की करणार. 1 जानेवारीला माझं लावणी साँग येतंय. लावणी खूप छान आहे. लावणी सर्वांनी बघा, प्रतिसाद द्या. तसेच घुंगरु या सिनेमाचंही काम सुरुंय”..
प्रश्न: राजकारणात येण्याची ऑफर?
गौतमी : राजकारणात येण्याबाबत अजूनही काही विचारणा झालेली नाही. तसं काही नाही. मला कुणी काही विचारलेलं नाही. मला राजकारणात रस नाही. त्यात मी पडणार नाही, राजकारण अजिबात नाही”.
