पालघरमध्ये उद्यापासून रंगणार महिला साहित्य संमेलन

टीम बाईमाणूस / १० जून २०२२

कोकण मराठी साहित्य परिषदेच्या शनिवारी ११ आणि रविवारी १२ जून रोजी पालघर टेंभोडे येथील सोनोपंत दांडेकर महाविद्यालयाच्या प्रांगणात आयोजित करण्यात आलेल्या सहाव्या महिला साहित्य संमेलनाची तयारी पूर्ण झाली आहे. या दोन दिवसीय संमेलनामध्ये राज्यातील साहित्य प्रेमींना भरगच्च कार्यक्रमाचा आस्वाद लुटता येणार आहे. त्यामध्ये चर्चासत्र, कवियत्री कट्टा, स्थानिक लेखकांचे पुस्तक प्रकाशन, परिसंवाद व इतर अनेक कार्यक्रमाबरोबर सांस्कृतिक कार्यक्रमाचीही रेलचेल ठेवण्यात आली आहे. त्यामुळे साहित्य रसिकांना दोन दिवस मनमुराद आनंद लुटता येणार आहे.

ज्येष्ठ साहित्यिका मोनिका गजेंद्रगडकर अध्यक्षस्थानी

ज्येष्ठ साहित्यिका मोनिका गजेंद्रगडकर यांच्या अध्यक्षतेखाली हे संमेलन पार पडणार आहे. साहित्य संमेलनाच्या उद्घाटक म्हणून विधान परिषदेच्या उपसभापती डॉ. नीलम गोऱ्हे उपस्थित राहणार आहेत. याप्रसंगी प्रमुख अतिथी म्हणून ज्येष्ठ अभिनेत्री मधुरा वेलणकर, तसेच कोकण मराठी साहित्य परिषदेच्या केंद्रीय अध्यक्ष नमिता कीर सहभागी होणार असून, या साहित्य संमेलनाचे स्वागताध्यक्ष पद महिला आर्थिक विकास महामंडळाच्या अध्यक्ष ज्योती ठाकरे भूषविणार आहेत.

संमेलनाच्या पहिल्या दिवशी म्हणजेच, शनिवारी ११ जूनला सामाजिक कार्यकर्त्या, लेखिका वृषाली मगदूम यांच्या अध्यक्षतेखाली ‘आजची आत्मनिर्भर स्त्री’ या चर्चासत्राचे आयोजन केले जाणार असून त्यानंतर ‘स्त्री साहित्याच्या बदलता दिशा, बदलते भान’ हा परिसंवाद प्रा. मीना गोखले यांच्या अध्यक्षतेखाली होणार आहे. याच दिवशी ‘कोमसाप’मधील कवयित्रींसाठी आयोजित करण्यात आलेल्या कवयित्री कट्ट्याचे उद्घाटन आमदार मनीषा चौधरी यांच्या हस्ते होणार असून, यावेळी ज्येष्ठ कवयित्री हेमांगी नेरकर या अध्यक्षस्थान भूषविणार आहेत. निमंत्रित कवयित्रींचे ‘उमलते शब्द’ हे काव्यसंमेल डॉ. अनुपमा उजगरे यांच्या अध्यक्षतेखाली आयोजित करण्यात आले आहे. याखेरीज पालघर जिल्ह्यातील स्थानिक लेखिकांचे पुस्तक प्रकाशन व मान्यवरांच्या सत्काराचे आयोजन करण्यात आले आहे.

परिसंवादाची रेलचेल

संमेलनाच्या दुसऱ्या दिवशी रविवार, १२ जूनला संमेलन समारोप शुभारंभ महिला व बालविकासमंत्री ॲड. यशोमती ठाकुर यांच्या हस्ते होणार असून, याप्रसंगी ज्येष्ठ सुसंवादक मंगला खाडिलकर सहभागी होणार आहेत. त्यानंतर ‘कवितेची लय… कवितेचा ताल’ या महिलांनी लिहिलेल्या प्रसिद्ध कवितांवर आधारित नृत्य सादर केला जाणार आहे.

या साहित्य संमेलनाचे आकर्षण असणाऱ्या ‘महिलांचे राजकीय आरक्षण कथा व व्यथा’ हा परिसंवाद आयोजित करण्यात आला असून, या परिसंवादाचे अध्यक्षस्थान मुंबईच्या माजी महापौर निर्मला सामंत प्रभावळकर भूषविणार आहेत. या परिसंवादात आमदार प्रणिती शिंदे, आमदार अदिती तटकरे, मुंबईच्या माजी महापौर किशोरी पेडणेकर, वसई-विरार महापालिकेच्या माजी महापौर प्रवीणा ठाकूर व पालघरच्या पहिल्या जिल्हा परिषद अध्यक्ष सुरेखा थेतले सहभागी होणार आहेत. या संमेलनात विस्मृतीत जाणाऱ्या लोककलांना उजळा देणारा ‘लोकरंग’ कार्यक्रम आयोजित केला जाणार आहे. साहित्य संमेलनाच्या समारोपासाठी अध्यक्षस्थानी खासदार सुप्रिया सुळे, अभिनेत्री, लेखिका डॉ. निशिगंधा वाड तसेच ज्येष्ठ लेखिका, कवयित्री नीरजा सहभागी होणार आहेत.

महिला साहित्य संमेलनाच्या पहिल्या दिवशी रात्री पालघर जिल्ह्यातील महिलांकडून सांस्कृतिक कार्यक्रमांचे सादरीकरण होणार आहे. साहित्य संमेलनात कला दालन, ग्रंथ प्रदर्शन आयोजित केले जाणार असून, याप्रसंगी स्मरणिका प्रकाशित केली जाणार आहे.

नवीन लेख

संबंधित लेख

Leave a reply

Please enter your comment!
Please enter your name here