बागेश्वर बाबांच्या घटनाविरोधी अशास्त्रीय दाव्यांविरोधात कायदेशीर कारवाईची मागणी

• टीम बाईमाणूस

अपरिचित व्यक्तीच्या भूतकाळात घडलेल्या गोष्टी अचूकपणे कागदावर लिहून दाखवतो. लोकांच्या मनात काय सुरू आहे ते ओळखतो. रावणासोबत फोनद्वारे बोलतो. आजार बरे करतो. भूत प्रेते पळवून लावतो. लिंबूद्वारे समाधान प्राप्त करून देतो. ईश्वराचा दूत आहे, आदी दावे बागेश्वर धामचे धीरेंद्र शास्त्री बाबा त्यांच्या कार्यक्रमातून करतात. तसेच संतांसंबंधी बदनामीकारक वक्तव्य करतात. संविधान मूल्यविरोधी, अशास्त्रीय, अवैज्ञानिक आणि अंधश्रद्धेला खतपाणी घालणारे दावे आणि भाष्य करणाऱ्या बागेश्वरच्या बाबांवर गुन्हा दाखल करून कारवाई करावी, अशी मागणी महा. अंनिसच्या पुणे जिल्हा कार्यकारिणीने केली आहे. पुण्यात सोमवार ते बुधवार असा तीन दिवस बागेश्वरच्या बाबांचा सत्संग व दरबार कार्यक्रम होत आहे, त्यानिमित्ताने महा. अंनिस पुणे जिल्हा कार्यकारिणीने ही मागणी केली आहे, अशी माहिती पत्रकार परिषदेत संघटनेचे पूर्णवेळ कार्यकर्ते विशाल विमल यांनी दिली. यावेळी महा.अंनिस पुणे जिल्हा कार्याध्यक्ष सम्यक वि. म., जिल्हा पदाधिकारी एकनाथ पाठक, प्रतीक पाटील आदी उपस्थित होते.

भारतीय राज्यघटनेने व्यक्तीला देव धर्म श्रद्धा उपासना स्वातंत्र्य दिले. त्याचा महा. अंनिस संघटना आदर करते. मात्र व्यक्तीची देव धर्म श्रद्धा उपासनेच्या आधारे फसवणूक, दिशाभूल, शोषण होत असेल, त्यातून सार्वजनिक आरोग्य, नीतिमत्ता, कायदा सुव्यवस्थेला अडथळा येत असेल त्याविरोधी संघटना भूमिका, प्रबोधन, प्रतिकार, कृतिकार्यक्रम करत आली आहे. महा. अंनिसचे हे वर्तन घटनेशी सुसंगत असून मानवी जीवन समृद्ध करण्यासाठीचे आहे. बागेश्वरचे बाबा हे लोकांच्या देव, धर्म, श्रद्धा, उपासना आणि भावना, अगतिकता, अज्ञान यांचा गैरफायदा घेऊन लोकांना देव धर्म श्रद्धा उपासनेशी निगडित विसंगत, अशास्त्रीय, अवैज्ञानिक बाबी सांगत आहेत.

लोकांना ते सांगून प्रभावित करत असून अशास्त्रीय मार्गाने जगण्यास प्रवृत्त करत आहेत. हे भारतीय राज्यघटनेच्या दृष्टीने विसंगत आहे. भारतीय राज्य घटनेत वैज्ञानिक दृष्टिकोनाचा अंगीकार करणे हे नागरिकांचे कर्तव्य असल्याचे सांगितले आहे. मात्र बागेश्वरचे बाबा अशास्त्रीय, अवैज्ञानिक दावे करून लोकांना प्रभावित करत आहेत. देशात केंद्र शासनाचा ड्रग्ज अँड मॅजिक रेमिडीज अडव्हरटाइजमेन्ट ऑब्जेक्श नेबल ॲक्ट 1954 व राज्यात दहा वर्षांपासून जादूटोणाविरोधी कायदा लागू आहे. या कायद्याचे उल्लंघन बागेश्वरच्या बाबांकडून होत आहे. जिजाई उर्फ अवली ही तुकोबांची पत्नी त्यांना दररोज मारहाण करीत असे म्हणून ते रामजीचे भक्त झाले, असेही संत तुकाराम महाराजांबद्दल खोटे आणि बदनामीकारक वक्तव्य या बाबांनी केलेले आहे. त्यामुळे त्यांच्यावर कारवाईची मागणी करत आहोत, असेही विशाल विमल यांनी सांगितले.

काय आहेत मागण्या ?

1) बागेश्वरचे बाबा हे भारतीय राज्यघटनेच्या तत्वाशी विसंगत असे अशास्त्रीय दावे, भाष्य करत आहेत. त्यामुळे घटनेच्या तत्वाच्या विरोधी दावे व भाष्य करणाऱ्या बाबांवर शासन व्यवस्थेने जादूटोणाविरोधी कायदा, ड्रग्ज अँड मॅजिक ॲक्ट आणि तत्सम कायद्यांनुसार कारवाई करावी.

2) संतांसंबंधी बागेश्वरच्या बाबांचे बदनामीकारक, अब्रुनुकसानकारक वक्तव्य भाष्य लक्षात घेऊन त्यांच्यावर भारतीय दंड संहिता आणि अन्य तत्सम कायद्यानुसार कारवाई करावी.

3) बागेश्वरचे बाबा करत असलेले दावे अशास्त्रीय असल्याची उकल करून शास्त्रीय विचारधारा समाजात रुजवण्यासाठी शासन संस्थेने प्रसारमाध्यमे, शिक्षण संस्था आदींमार्फत प्रयत्न करावेत.

4) बागेश्वरचे बाबांच्या दाव्यांविरोधी महा. अंनिस शास्त्रीय माहिती, वैज्ञानिक दृष्टिकोनाचा प्रसार करण्याचे काम करत आहे, त्याला शासन व्यवस्थेने पाठबळ द्यावे.

5) बागेश्वरच्या बाबा करत असलेले दावे त्यांनी सिद्ध करण्याचे महा. अंनिसचे आव्हान स्वीकारावे. यासंबंधी प्रसारमाध्यमातून बाबांना आव्हान कळविले आहे. संघटनेच्यावतीने लवकरच बाबांशी पत्रव्यवहार केला जाणार आहे. राज्यात सोईच्या ठिकाणी नियंत्रित परिस्थितीत दावे सिद्ध करण्याची प्रक्रिया पार पाडली जाईल. ते दावे सिद्ध केल्यास 21 लाख रुपयांचे बक्षीस दिले जाईल.

6) पुण्यात संगमवाडी परिसरात बागेश्वरच्या बाबांचा कार्यक्रम सोमवार, मंगळवार, आणि बुधवारी (दि. 20, 21, 22) होत आहे. अशास्त्रीय, अवैज्ञानिक, अंधश्रद्धेला खतपाणी घालणे आणि बदनामीकारक वक्तव्य आणि प्रक्षोभक विधाने, सामाजिक स्वास्थेय बिघडवणारी वक्तव्ये बागेश्वरच्या बाबांकडून घडू नये यासाठी बाबा आणि कार्यक्रमांच्या संयोजकांना शासन व्यवस्थेने सक्त ताकीद द्यावी.

7) पुण्यात होत असलेल्या सदर कार्यक्रमाने व्हिडीओ शूटिंग करण्याची सूचना संयोजकांना शासन व्यवस्थेने द्यावी. प्रचलित कायद्यांच्या विसंगत विधाने, भाष्य, वक्तव्ये, इशारे, कृत्य घडल्यास बाबांवर गुन्हे दाखल करून कारवाई करावी.

घटनाविरोधी वक्तव्य करणाऱ्या बाबांवर गुन्हे दाखल करून कारवाई करावी, या मागणीचे निवेदन सहाय्यक पोलीस आयुक्त विठ्ठल दबडे यांच्यामार्फत पुणे पोलीस आयुक्त यांना दिले. यावेळी विशाल विमल, एकनाथ पाठक, प्रतीक पाटील उपस्थित होते.