आमच्या विषयी

बाईमाणूसची गरज का आहे?

महाराष्ट्रासारख्या विकसनशील राज्यात खास करून दुर्गम आणि ग्रामीण भागात राहणाऱ्या लाखो नागरिकांपर्यंत अजूनही माध्यमे पोहोचली नाहीत हे वास्तव आहे. विशेषतः दलित, आदिवासी, भटके विमुक्त आणि ग्रामीण भागातील लाखो शेतकरी-शेतमजूर असे अनेक समाजातील घटक सांगता येतील. याशिवाय अस्तित्वात असणाऱ्या बहुतांश माध्यमांचा सगळा व्यवहार हा पुरुषी आणि अभिजन असल्यासारखा आहे. पुरुषी चेहरा असलेल्या या माध्यमात विशिष्ट वर्गाच्या, जातीच्या आणि लिंगाच्याचं बातम्यांना स्थान दिलेले असते. नेहमीच बहुसंख्यांचा विचार करून बातम्यांची रचना केली जाते. यामुळेच पत्रकारांची प्रस्थापित असणारी व्याख्या बदलण्याचा प्रयत्न करून आधुनिक तंत्रज्ञानाच्या नव्या संवाद-माध्यमांच्या मदतीने राज्यातील सर्व घटकांतील महिलांचा आवाज बुलंद करण्यासाठी, त्यांच्या रोजच्या जगण्यापासून ते त्यांच्या आजूबाजूचा पूर्ण अवकाश त्यांच्या भाषेत व्यक्त करता यावा यासाठी वरिष्ठ पत्रकार प्रशांत पवार आणि एमजीएम विद्यापिठाचे वृत्तपत्रविद्या आणि जनसंवाद महाविद्यालयाने बाईमाणूस या डिजिटल मीडिया हाऊसची निर्मित केली. कोणतेही वैचारिक, आर्थिक, राजकीय जोखड नसलेल्या स्वतंत्र पत्रकारितेचा हा एक प्रयत्न आहे. baimanus.in या वेबसाईटचा उद्देश आपली माती आणि माणसांशी इमान राखणारी पत्रकारिता करण्याचा आहे. सामान्य माणूस केंद्रित पत्रकारिता करण्यावर भर देणारा आहे. 'बाईमाणूस'चा अजेंडा लोकानुनय करणारा नाही पण लोकांचे प्रश्न, मुद्दे आणि हित याला प्राधान्य देणाऱ्या लोकाभिमुखी पत्रकारितेचा आहे. माहितीचा महापूर सतत या ना त्या माध्यमातून आपल्यासमोर येतो आहे. त्यामुळे अनेकदा आपली अवस्था भर कोलाहलाच्या मधोमध उभी असल्यासारखी होते. त्यामुळे या सर्वांकडे कसे पाहावे, त्यातून काय घ्यावे आणि काय नाही, याचा दृष्टिकोन देण्याचे काम 'बाईमाणूस' करत आहे.