रस्त्यावरून नगरभवनापर्यंत! भटक्या-विमुक्त समाजाचा सत्तेपर्यंत प्रवास

दारोदारी फिरून उदरनिर्वाह करणारा, हक्काच्या योजनांसाठी अर्ज करूनही वारंवार निराश होणारा वैदू समाज आज कंधारमध्ये एका नव्या वळणावर उभा आहे. शिक्षणातील खंड, व्यवसायातील अस्थिरता आणि राजकीय प्रतिनिधित्वाचा अभाव सहन करत असतानाच या समाजाने पहिल्यांदाच स्वतःचा लोकप्रतिनिधी निवडून दिला आहे. नांदेड जिल्ह्यातील कंधार नगरपरिषदेच्या प्रभाग क्रमांक २ मधील हा निकाल केवळ एका नगरसेवकाचा विजय नाही, तर दशकानुदशकांच्या दुर्लक्षावर उमटलेली ठाम राजकीय नोंद आहे. वर्षानुवर्षे ‘भटक्या समाज’ म्हणून ओळखल्या गेलेल्या वैदू समाजाने मतदान केलं, पण निर्णय प्रक्रियेत कधीच आपला माणूस पाहिला नाही. जवळपास पन्नास वर्षांच्या राजकीय वनवासानंतर नगरसेवक म्हणून स्वतःचा प्रतिनिधी निवडून येणं ही या समाजासाठी ऐतिहासिक संधी ठरते. कंधारच्या गल्लीबोळात हा विजय जल्लोषात नाही, तर शांत समाधानात स्वीकारला जातोय. मोठ्या घोषणा नाहीत, पण ‘आता आमचा माणूस तिथे आहे’ ही भावना लोकांच्या नजरेतून स्पष्ट दिसते. आणि हाच या निकालाचा खरा अर्थ आहे.