प्रोजेक्ट धरित्री

हवामान बदलाच्या संकटाचा सामना करताना, त्याच्या प्रभावांचे लिंग परिणाम समजून घेणे आणि ते धोरणात्मक चौकटीत प्रतिबिंबित होणे महत्त्वाचे आहे. हवामान बदलामुळे स्त्रियांना उच्च जोखीमांचा सामना करावा लागतो आणि हवामान बदलाच्या परिणामांचा मोठा भार त्यांना सहन करावा लागतो. हे विशेषतः आरोग्यावर होणाऱ्या विपरित परिणामांच्या बाबतीत दिसून आले आहे. त्यामुळे लिंग-संबंधित आरोग्य असमानता आणि विषमता वाढते. हाच मुद्दा लक्षात घेऊन BaiManus आणि ASAR यांच्या संयुक्त विद्यमाने 'प्रोजेक्ट धरित्री' हा हवामान बदल आणि लिंगभाव (Climate and Gender) या विषयाशी संबंधीत उपक्रम सुरू करण्यात येत आहे. हवामान बदलाचे लिंगनिहाय परिणाम, त्यावरील समस्या आणि समस्यांचे निराकरण यासंदर्भातील पत्रकारितेला तळागाळातील महिलांच्या माध्यमातून पुढे आणण्यासाठी प्रोजेक्ट धरित्री हा प्रकल्प सुरू केला आहे. या प्रकल्पाच्या माध्यमातून हवामान बदल आणि त्याचे लिंगनिहाय परिणाम याविषयाशी संबंधित पत्रकारितेचे लोकशाहीकरण करण्याचा आमचा प्रयत्न आहे.