कोमल ठोंबरे
‘’बॉलिवु़डची कलाकार नुसरत भरुचाने उज्जैनच्या महाकाल मंदिरात जाऊन पूजा-अर्चा केली, जल अर्पण केले, दर्शन घेतले, चादर ओढली, कपाळावर कश्का (चंदन) लावले. तिने केलेल्या या सर्व गोष्टी शरियतच्या दृष्टीने गुन्हा आहेत आणि सर्वात मोठा गुन्हा आहे. हा गुनाह-ए-अजीम आहे. नुसरतने यासाठी तौबा करावा, माफी मागावी आणि कलमा वाचावा’’ असा फतवा ऑल इंडिया मुस्लिम जमातचे अध्यक्ष मौलाना शहाबुद्दीन रिझवी बरेलवी यांनी काढला आहे.
नुसरत भरुचाने दोन दिवसांपूर्वी उज्जैनमधील महाकाल मंदिरात जाऊन दर्शन घेतल्याने नवा वाद निर्माण झाला आहे. ती नुकतीच मध्य प्रदेशातील उज्जैन इथल्या महाकाल मंदिरात दर्शनासाठी गेली होती. या दर्शनानंतर तिचे काही फोटो आणि व्हिडीओ सोशल मीडियावर व्हायरल झाले. नुसरत भरुचाने तिच्या अधिकृत इंस्टाग्राम अकाउंटवरून उज्जैन महाकाल मंदिरातील एक फोटो देखील शेअर केला होता, ज्यासोबत तिने लिहिले होते, जय श्री महाकाल. त्यानंतर मुस्लीम समाजातील नेटकऱ्यांनी तिच्यावर टीका करण्यास सुरुवात केली.
मौलवी शहाबुद्दीन रझवी हे अखिल भारतीय मुस्लीम जमातचे राष्ट्रीय अध्यक्ष आहेत. ते अनेकदा त्यांच्या वादग्रस्त विधानांमुळे चर्चेत असतात. यावेळी त्यांनी नुसरत भरुचाला लक्ष्य केलंय. याविषयी मौलाना शहाबुद्दीन म्हणाले,
“नुसरत भरुचा उज्जैनमधल्या महाकाल मंदिरात गेली. तिथे तिने पूजा केली आणि शिवलिंगावर पाणी अर्पण केलं. तिथल्या धार्मिक परंपरांचं तिने पालन केलं. इस्लाम या सर्व गोष्टींना परवानगी देत नाही. शरियानुसार नुशरतने आता पश्चात्ताप करावा, इस्तिगफर करावी आणि कलमाचं पठण करावं. तिचं हे कृत्य इस्लामच्या तत्त्वांविरोधत आहे. त्यामुळे ती शरियाच्या कक्षेत आली आहे आणि ती गंभीर पापाची दोषी बनली आहे. तिला पश्चात्ताप करणं आवश्यक आहे.”
नुसरत भरुचा मुस्लिम बोहरा समुदायाची…
नुसरत भरुचा मुस्लिम बोहरा समुदायाशी संबंधित आहेत. मात्र, लहानपणापासूनच त्यांचे कुटुंब धर्मनिरपेक्ष राहिले आहे. काही काळापूर्वी शुभांकर मिश्रा यांच्या पॉडकास्टमध्ये नुसरत भरुचाने सांगितले होते की, ती लहानपणापासूनच अनेक मंदिरांना भेट देत आली आहे. फक्त मंदिरेच नाही तर त्या गुरुद्वारे आणि चर्चमध्येही जात आली आहे. तिने अनेक वेळा वैष्णो देवी आणि केदारनाथचे दर्शनही घेतले आहे. याशिवाय, तिने संतोषी मातेचे व्रतही केले आहे. यासोबतच ती नमाजही अदा करते.
मागे एकदा शुभंकर मिश्रा यांच्या पॉडकास्टला दिलेल्या मुलाखतीत नुसरत भरुचाने देवावरील श्रद्धेबद्दल आपले विचार व्यक्त केले. तिने सांगितले की ती मुस्लिम असूनही, तिची महादेवावर खूप श्रद्धा आहे. तिने 16 शुक्रवार संतोषी मातेचे व्रत देखील ठेवले आहे. तिला अंकशास्त्रावर खूप विश्वास आहे. म्हणूनच तिने तिचे नाव बदलले.
16 शुक्रवारी केलेले उपवास
नुसरत भारुचा म्हणाली- 'मी लहानपणापासून मंदिरात जात आहे. मी गुरुद्वारा आणि चर्चलाही गेले आहे. जिथे तुम्हाला शांती मिळेल, मग ते मंदिर असो, गुरुद्वारा असो किंवा चर्च असो, तिथे तुम्ही जायला हवे. मी हे उघडपणे सांगते की मी नमाज करते.
जर मला वेळ मिळाला तर मी दिवसातून पाच वेळा नमाज अदा करते. मी प्रवास करताना माझी नमाज करण्याची चटईही सोबत ठेवते. जिथे मला शांती आणि समाधान मिळते तिथे मी जाते. मी नेहमीच असा विश्वास ठेवला आहे की देव एक आहे आणि त्याच्याशी जोडण्याचे वेगवेगळे मार्ग आहेत. आणि मला त्या सर्व मार्गांचा शोध घ्यायचा आहे.
नुसरत पुढे म्हणाली- 'जेव्हा मी केदारनाथला गेले होते तेव्हा मला तिथे बसायचे होते. मला काहीही नको होते, फक्त तिथेच बसून राहायचे होते. मी वैष्णोदेवीलाही गेले आहे. फक्त तिथे मला डोके टेकवायला नाही मिळाले. मी पायऱ्या चढून तिथे गेले. मी 13 किलोमीटर चालली, दर्शन घेतले आणि परत आली. या सगळ्यासाठी माझ्याकडे कोणतेही तर्क नाही.
मला फक्त जायचे आहे एवढेच माझ्या मनात येते. जर माझ्या मनात असे काही आले की मला ते करावेच लागेल, मग मी कोणाचेही ऐकत नाही, मी जास्त विचारही करत नाही. जर मला तिथे जायची इच्छा असेल तर मला जावेच लागते. मला माहित नाही की या गोष्टी कुठून येतात, कदाचित ती काही आध्यात्मिक शक्ती असेल किंवा आणखी काही.
कोण आहेत हे फतवा काढणारे शहाबुद्दीन रझवी?
याप्रकरणी अद्याप नुसरतची कोणतीच प्रतिक्रिया समोर आली नाही. याआधी शहाबुद्दीन रझवी यांनी मुस्लीम समुदायाला नवीन वर्ष साजरं करून नये असं आवाहन करणारा एक व्हिडीओ पोस्ट केला होता. त्यांनी याला फालतूचा खर्च आणि शरिया कायद्यानुसार नवीन वर्ष साजरं करणं बेकायदेशीर असल्याचं म्हटलं होतं. त्यांचं हे वक्तव्य सोशल मीडियावर चर्चेचा विषय बनलं होतं.
त्यांनी या व्हिडीओत असंही सांगितलं होतं की इस्लामिक कॅलेंडर वर्षाची सुरुवात मोहरम महिन्यापासून होते. 31 डिसेंबर किंवा 1 जानेवारी रोजी नवीन वर्ष साजरा करणं ही एक युरोपियन परंपरा आहे. न्यू इअर सेलिब्रेशनच्या नावाखाली 31 डिसेंबरच्या रात्री अश्लीलता, आवाज, गोंधळ, नाच-गाणं केलं जातं. शरिया कायद्यात या गोष्टींना परवानगी नाही, असं त्यांनी म्हटलं होतं.
