‘My Baby, Dream girl’ असं म्हणत पाकिस्तानला गोपनीय माहिती पुरवणाऱ्या प्रदीप कुरुलकरचा खटला लवकरच सुरू होणार…

झारा नावाची एक पाकिस्तानी एजंट आणि लष्कराच्या संशोधन आणि विकास संस्थेचे (DRDO) वरिष्ठ शास्त्रज्ञ प्रदीप कुरुलकरचॅ ‘चॅट’ मध्ये झालेले एक संभाषण…

पाकिस्तानी एजेंट झारा - बेबी, मी आताच हे वाचलं, तुम्ही याच गोष्टीवर काम करत आहात का?
DRDO शास्त्रज्ञ प्रदीप कुरुलकर - हां. मी SAMs वर काम करत आहे.
झारा - तुम्ही हे आर्मी देणार की एअरफोर्सला?
प्रदीप - दोघांनाही
झारा - याचं टेस्टिंग आणि ट्रायल पूर्ण झालं का?
झारा - अच्छा एक गोष्ट सांगा... ब्राम्होसही तुमचा शोध आहे का बेबी?
प्रदीप - माझ्याकाडे सुरुवातीच्या डिझाईनचे रिपोर्ट्स आहेत. 
झारा हे एअर लाँच्ड व्हर्जन होतं ना? आपण या आधीहीय यावर बोललो होतो
प्रदीप - हम्मम…

झारा - तुमची टेस्ट यशस्वी ठरली का?
प्रदीप - लॉन्चर ही माझी डिझाइन आहे बेब
झारा - टेस्ट सक्सेफुल झाली का?
प्रदीप - मोठं यश मिळालं
झारा- मी असं ऐकलं आहे की अग्नि-6 वरही काम सुरु आहे, त्याची टेस्ट कधी आहे?
प्रदीप - करणार आहे, सांगेन.



हा तोच डॉ. प्रदीप कुरुलकर आहे ज्याला पाकिस्तानी गुप्तचर यंत्रणेला भारताची संरक्षणविषयक गोपनीय माहिती पुरविल्याप्रकरणी अटक झाली होती. दोन वर्षांपूर्वी झालेल्या या प्रकरणानंतर अगदी लहानपणापासून राष्ट्रीय स्वयंसेवक संघाशी संबंधित असलेल्या प्रदीप कुरुलकरचं पुढे काय झालं याबद्दल काहीच कळत नव्हतं. कुरुलकरला शिक्षा कधी होणार याबद्दलच्या बातम्या अधूनमधून प्रसिद्ध होत होत्या. माक्ष सरकारकडून किंवा पोलिसांकडून याबद्दल फारशी माहिती मिळत नव्हती.

डॉ. प्रदीप कुरुलकरविरुद्ध आरोप निश्चितीचा मसुदा सादर

आता मात्र पुन्हा एकदा प्रदीप कुरुलकरचे नाव चर्चेत आले आहे. प्रदीप कुरुलकर याच्याविरुद्ध आरोप निश्चितीचा मसुदा विशेष न्यायालयात सादर करण्यात आला. त्यामुळे आता या खटल्याच्या प्रत्यक्ष सुनावणीस लवकरच सुरुवात होणार आहे.

विशेष सरकारी वकील उज्ज्वला पवार यांनी विशेष न्यायाधीश व्ही. आर. कचरे यांच्या न्यायालयात आरोप निश्चितीचा मसुदा सादर केला. कुरुलकरविरुद्ध राज्य दहशतवादविरोधी पथकाकडून (एटीएस) 2023 मध्ये दोन हजार पानांचे आरोपपत्र सादर केले. त्याच्याविरुद्ध आरोप निश्चित केल्यानंतर खटल्याची सुनावणी सुरू करण्यासाठी आता सरकार पक्षाकडून प्रयत्न सुरू करण्यात आले आहेत.

कुरुलकर हा पाकिस्तानी गुप्तचर यंत्रणेच्या संपर्कात आला होता. समाज माध्यमातून झारा दासगुप्ता या महिलेच्या संपर्कात तो होता. त्याने भारतीय संरक्षण सिद्धतेविषयीची गाेपनीय आणि संवेदनशील माहिती दासगुप्ताला पुरविली होती. दासगुप्ताच्या नावाने पाकिस्तानी गुप्तचर यंत्रणेने समाजमाध्यमात बनावट खाते उघडले होते. प्रत्यक्षात दासगुप्ता ही पाकिस्तानी गुप्तचर यंत्रणेतील महिला होती. त्याच्या हालचालींवर भारतीय लष्कराच्या गुप्तचर यंत्रणेने नजर ठेवली होती.

त्याने पाकिस्तानी गुप्तचर यंत्रणेला गोपनीय माहिती पाठविल्याचे उघड झाल्यानंतर त्याला एटीएसने 4 मे 2023 रोजी अटक केली होती. त्याच्याकडून लॅपटाॅप, मोबाइल संच, अन्य इलेक्ट्राॅनिक साधने जप्त करण्यात आली होती. संबंधित इलेक्ट्राॅनिक साहित्य न्यायवैद्यकीय प्रयोगशाळेत तांत्रिक विश्लेषणात पाठविण्यात आली होती. तांत्रिक विश्लेषणातून तो पाकिस्तानी गुप्तचर यंत्रणेच्या संपर्कात असल्याचे उघड झाले होते.

त्याने दासगुप्ताला भारतीय लांब पल्ल्याच्या क्षेपणास्त्रांविषयी गोपनीय, संवेदनशील माहिती पुरविली होती. त्याने परदेशात जाऊन दासगुप्ता असे नाव सांगणाऱ्या महिलेची भेटही घेतली होती. त्याने पाकिस्तानी हेरांना संरक्षणविषयक माहिती कशी पुरविली, याची माहिती आरोपपत्राद्वारे देण्यात आली. त्यानंतर त्याच्याविरुद्ध आरोपपत्राचा मसुदा विशेष न्यायाधीश व्ही. आर. कचरे यांच्या न्यायालायत सादर करण्यात आला.

कुरुलकर सध्या येरवडा कारागृहात न्यायालयीन कोठडीत आहे. त्याने त्याच्या वकिलांमार्फत जामीन मिळवण्यासाठी अर्ज सादर केला होता. गेल्या वर्षी विशेष न्यायालयाने त्याचा जामीन अर्ज फेटाळून लावला.

कुरुलकरने देशाच्या सार्वभौमत्वाला बाधा पोहोचविणारे कृत्य केले आहे. त्याने संरक्षणविषयक गोपनीय आणि संवेदनशील माहिती पाकिस्तानी गुप्तचर यंत्रणेला दिली आहे. या खटल्याचा निकाल लवकर लागावा, तसेच प्रत्यक्ष सुनावणीस सुरुवात व्हावी, या दृष्टीने सरकार पक्षाकडून आरोप निश्चितीचा मसुदा न्यायालयात सादर केला आहे.

संंबंधित मसुदा वगळावा (डिस्चार्ज), अशी मागणी कुरुलकरच्या वकिलांनी केली आहे, असे विशेष सरकारी वकील उज्ज्वला पवार यांनी नमूद केले. आरोप निश्चितीचा मसुदा सादर केल्यानंतर न्यायालयात प्रत्यक्ष सुनावणीस प्रारंभ होऊन या खटल्याचा निकाल लवकरात लवकर लावण्यासाठी सरकार पक्षाकडून प्रयत्न सुरू करण्यात आले आहेत.



प्रदीप कुरुलकर कोण आहे?

कुरुलकर हा डीआरडीओ मधील एक नामवंत शास्त्रज्ञ मानला जायचा. कुरुलकरचा जन्म 1963 साली झाला. त्याने सीओईपी पुणे येथून इलेक्ट्रिकल इंजिनीअरिंगमध्ये बॅचलर डिग्री (बीई) पूर्ण केल्यानंतर 1988 मध्ये ते सीव्हीआरडीई, अवडी येथे डीआरडीओमध्ये रुजू झाला. पुढे त्याने आयआयटी कानपूरमधून पॉवर इलेक्ट्रॉनिक्स मधील प्रगत अभ्यासक्रम पूर्ण केले.

क्षेपणास्त्र प्रक्षेपक, लष्करी अभियांत्रिकी उपकरणे, प्रगत रोबोटिक्स आणि लष्करी वापरासाठीचे मोबाइल मानवरहित प्रणालीचे डिझाइन यामध्ये त्याचे स्पेशलायझेशन आहे. कुरुलकरने डीआरडीओमध्ये अनेक महत्त्वपूर्ण प्रकल्पांवर काम केलं आहे. डीआरडीओच्या क्षेपणास्त्रांच्या प्रक्षेपण आणि ग्राउंड सिस्टीम्सच्या निर्मितीच्या त्याने मोलाची भूमिका बजावलेली आहे.

डीआरडीओच्या उपग्रहभेदी क्षेपणास्त्र मिशन शक्तीच्या प्रक्षेपकाची निर्मिती कुरुलकच्या नेतृत्वात झाली होती. कुरुलकरला 2000 मध्ये सर्वोत्कृष्ट प्रकाशनासाठी सायन्स डे पुरस्कार, 2002 मध्ये उत्कृष्टतेसाठी डीआरडीओ अग्नि पुरस्कार, आकाश प्रोजेक्टसाठी 2008 मध्ये पथदर्शी संशोधन आणि उत्कृष्ट तंत्रज्ञान विकासासाठी डीआरडीओ पुरस्काराने गौरवण्यात आलेलं आहे. कुरुलकर हा 2023 मध्ये काही महिन्यांमध्ये निवृत्त होणार होता. पण त्याआधीच हा सगळा घटनाक्रम समोर आला.

प्रदीप कुरुलकर राष्ट्रीय स्वयंसेवक संघाचा कार्यकर्ता

प्रदीप कुरुलकरला 2023 मध्ये अटक झाल्यावर सोशल मिडीयावर एक फोटो व्हायरल झाला होता. त्यामध्ये प्रदीप कुरुलकर हा राष्ट्रीय स्वयंसेवक संघाशी संबंधित असल्याचा दावा करण्यात आला. या फोटोमध्ये कुरुलकर विनायक दामोदर सावरकर यांच्या स्मृतीप्रित्यर्थ आयोजित कार्यक्रमात भाषण करताना दिसत आहेत. काँग्रेसचे अध्यक्ष मल्लिकार्जून खर्गे यांनी त्यांच्या ट्वीटर अकाऊंटवर एक व्हिडीओ शेअर करत कुरुलकरावरुन आरएसएसवर निशाणा साधला होता. 

व्हायरल झालेल्या या व्हीडिओमध्ये प्रदीप कुरुलकर असं सांगत आहेत की त्याचं कुटुंब 4 पिढ्यांपासून आरएसएससोबत जोडलं गेललं आहे. तसेच यामध्ये कुरुलकर सरसंघचालक मोहन भागवत यांच्यासमोर एका कार्यक्रमात भाषण करताना दिसत आहेत. विरोधकांच्या टिकेवरचं राष्ट्रीय स्वयंसेवक संघाचे अधिकृत उत्तर अजून समोर आलेलं नाही.

अशी झाली सुरुवात

धक्कादायक म्हणजे हनीट्रॅपमध्ये फसण्याच्या काही महिने आधीच प्रदीप कुरुलकरने हनीट्रॅप काय असतो? याबाबत जागरुकता कार्यक्रम केला होता. यात हनीट्रॅप म्हणजे काय? त्यात अडकू नये यासाठी टीप्सही दिल्या होत्या. मात्र तरीही तो हनीट्रॅपमध्ये अडकला.



हनीट्रॅपची सुरुवात झाली ती जून 2022 मध्ये. एकदिवस अचानक प्रदीप कुरुलकरच्या मोबाईलवर मेसेज आला. यात लिहिलं होतं, मी लंडनमध्ये राहाते आणि तुमची मोठी प्रशंसक आहे. तुम्ही भारतासाठी जे काम करताय ते अद्भूत आहे. माझं नाव झारा दासगुप्ता असं आहे. मी लंडनला राहाते आणि तुम्हाला सोशल मीडिवर फॉलो करते. याच मेसेजमुळे 59 वर्षीय प्रदीप कुरुलकरचा त्या कथित मुलीवर जीव जडला.

त्यानंतर त्या दोघांमध्ये चॅटिंग सुरु झालं. पण हेच चॅटिंग प्रदीप कुरुलकरला तुरुंगात टाकण्यास पुरेसं ठरलं. चॅटिंगसाठी ज्या व्हॉट्सॲप नंबरचा वापर केला जात होता, तो नंबर +44 ने सुरु होणारा होता. हा इंग्लंडचा कोड आहे. हा नंबर यासाठी निवडण्यात आला होता, ज्यातून त्या मुलीने इंग्लंडला असल्याचं भासवलं. मुलीच्या गोड-गोड बोलण्यात कुरुलकर हळूहळू फसत गेला. 

भारतीय असल्याचा बनाव

मुलीने आपण मुळची अंबालाचा असल्याचं सांगितलं. तसंच सायन्सची स्टुडंटअसून डिफेंसशी संबंधीत अभ्यास करत असल्याचं तीने कुरुलकला सांगितलं. त्यामुळे सोशल मीडियावर फॉलो करत अल्याचंही तीने सांगितलं. कुरुलकरला तिच्या बोलण्यावर विश्वास बसला.

हळू-हळू दोघांमध्ये खासगी गोष्टीही शेअर होऊ लागल्या. एकवेळ अशी आशी की कुरुलकर आणि जारा नावाच्या त्या मुलीमध्ये न्यूड फोटो आणि सेक्स चॅट शेअप केले जाऊ लागले. याच फोटोंच्या मदतीने जाराने प्रदीप कुरुलकरकडून अनेक टॉप सिक्रेटची माहिती करुन घेतली.

प्रदीप कुरुलकर अतिशय गोपनीय माहिती जाराला देत असल्याचं या संभाषणातून समोर आलं आहे. संवदेनशील ठिकाणी काम करणाऱ्या अधिकाऱ्यांना ही माहिती मित्रांनाच काय तर कुटुंबियानाही सांगता येत नाही. पण प्रदीप कुरुलकरने सर्व सीमा ओलांडल्या होत्या.