कोमल ठोंबरे
- मुंबईच्या अँटॉप हिल परिसरात राहणाऱ्या स्तुती सोनवणे या डॉक्टर तरुणीने 8 मार्च रोजी राहत्या घरी गळफास घेऊन आपलं जीवन संपवलं होतं.
- डॉ. स्तुती सोनवणे आत्महत्याप्रकरणी चुकीचे वृत्त आणि अफवा पसरत चालल्यामुळे तिच्या पालकांनी तीव्र शब्दांत नाराजी व्यक्त केली आहे.
- डॉ. स्तुतीच्या आत्महत्येनंतर या प्रकरणाला ‘लव्ह-जिहाद’चा रंग देण्याचा प्रयत्न सुरू झाला आहे.
डॉ. स्तुती सोनवणे आत्महत्याप्रकरणी प्रसार माध्यमांत आणि सोशल मीडियावर चुकीचे वृत्त आणि अफवा पसरत चालल्यामुळे तिच्या पालकांनी तीव्र शब्दांत नाराजी व्यक्त केली आहे.
‘’आमचा पोलिस आणि न्यायव्यवस्थेवर संपूर्ण विश्वास आहे. त्यांनी या विषयाबाबत सखोल न्यायपूर्ण चौकशी करुन गुन्हेगारांना योग्य ते शासन करावे. या चौकशी दरम्यान कोणत्याही प्रसारमध्यमात घाई- घाईत चुकीची माहिती छापू नये अथवा प्रसारीत करु नये, असे आमचे नम्र आवाहन आहे. तसेच ज्यांनी अशी अफवा अथवा चुकीची माहिती प्रसारीत केली असेल त्यांनी ती माहिती सुधारावी. कोणतीही संघटना, संस्था अथवा सोशल मिडिया यांनी आमच्या परवानगीशिवाय आमच्या मुलीच्या आत्महत्येविषयी पोटतिडकीने कोणतीही अफवा पसरवू नये’’ अशा शब्दांत स्तुतीचे वडील बजरंग सोनवणे आणि आई उषा सोनवणे यांनी एक निवेदन प्रसिद्ध केले आहे. हे निवेदन स्तुतीच्या पालकांनी अँटॉप हिल पोलीस स्टेशनलादेखील सादर केलं आहे.
मुंबईच्या अँटॉप हिल परिसरात राहणाऱ्या स्तुती सोनवणे या डॉक्टर तरुणीने 8 मार्च रोजी राहत्या घरी गळफास घेऊन आपलं जीवन संपवलं होतं. सुरुवातीला ही केवळ एक आत्महत्येची घटना वाटत असली तरी, स्तुतीने मागे सोडलेल्या 6 पानांच्या सुसाईड नोटने या प्रकरणाला वेगळंच वळण दिलं आहे. प्रियकर फुजैलच्या त्रासाला कंटाळून डॉ. स्तुती सोनवणे यांनी आत्महत्या केल्याचा प्राथमिक अंदाज आहे. फैजल मोहम्मद खानकडून सतत मानसिक छळ होत असल्याचा कथित सुसाईड नोटमध्ये उल्लेख आहे. 8 मार्च रोजी स्तुतीचे आई-वडील जेवण्यासाठी बाहेर गेले होते. हे दोघे घरी परत आल्यावर स्तुती तिच्या खोलीचा दरवाजा उघडत नव्हती. त्यावेळी स्तुतीच्या वडिलांनी खोलीचा दरवाजा तोडला असता स्तुतीने गळफास घेतल्याचे निदर्शनास आले. पोलिसांनी घटनास्थळी येऊन पंचनामा करुन स्तुती सोनवणे हिचा मृतदेह ताब्यात घेतला. शवविच्छेदन अहवालानुसार डॉ. स्तुती यांनी गळफास घेऊन आत्महत्या केल्याचे स्पष्ट झाले आहे.
डॉ. स्तुती सोनवणे यांचे वडील बजरंग सोनवणे
‘’डॉ. स्तुतीच्या आत्महत्येप्रकरणी चुकीच्या बातम्या प्रसारित करू नका’’ - वडील
‘’स्तुती मानसिक तणावात होती हे तिने कधी दाखवले नाही. ती हुशार होती अभ्यासू होती. त्या रात्री ती अभ्यासासाठी तिच्या खोलीत होती त्यानंतर तिने हे टोकाचे पाऊल उचलले. मात्र ती ज्या गोष्टींमध्ये मानसिक तणावात होती त्याबाबत आम्हाला कधीच सांगितलं नाही. सांगितलं असतं तर आम्ही त्यातून मार्ग काढला असता. आता माध्यमातून चुकीच्या पद्धतीने गोष्टी दाखवल्या जात आहेत. माझी पोलिसांकडून अपेक्षा आहे मुख्य आरोपीला शिक्षा झाली पाहिजे, अशी प्रतिक्रिया स्तुतीचे वडील बजरंग सोनवणे यांनी व्यक्त केली आहे.
आत्महत्या करण्यापूर्वी स्तुतीने ६ पानांची जी चिठ्ठी लिहून ठेवली होती, त्यावरही तिच्या वडिलांनी आक्षेप नोंदवला आहे. आपल्या निवेदनात बजरंग सोनवणे म्हणतात की, माझ्या मुलीने केलेल्या आत्महत्येच्या घटनेच्या संदर्भात काही व्यक्ती किंवा माध्यमांकडून संबंधित प्रकरणातील ‘कथित सुसाईड नोट’ मीडियामध्ये तसेच सोशल मीडियावर प्रसारित / प्रकाशित करण्यात आल्याचे आमच्या निदर्शनास आले आहे. सदर सुसाईड नोट ही पोलिस तपासातील एक महत्त्वाचा पुरावा असून तिची सत्यता, हस्ताक्षर पडताळणी व इतर तांत्रिक तपासणी होणे आवश्यक आहे. तपास पूर्ण होण्यापूर्वी अशा प्रकारे सुसाईड नोट सार्वजनिक करणे हे पोलिस तपास प्रक्रियेत हस्तक्षेप करणारे असून त्याचा तपासावर विपरीत परिणाम होण्याची शक्यता आहे.
तसेच, सुसाईड नोटमध्ये कोणत्याही व्यक्तीविरुद्ध आरोप किंवा उल्लेख असल्यास त्याची सत्यता न्यायालयीन प्रक्रियेद्वारे सिद्ध होणे आवश्यक आहे. त्या आधीच अशा मजकुराचे प्रसारण / प्रकाशन केल्यास संबंधित व्यक्तींची प्रतिष्ठा धोक्यात येण्याची तसेच बदनामी होण्याची शक्यता निर्माण होते. सदर कृती ही भारतीय न्याय संहिता (BNS) कलम 356 (बदनामी) तसेच माहिती तंत्रज्ञान अधिनियम, 2000 (Information Technology Act) च्या तरतुदी यांच्याशी विसंगत ठरू शकते. त्यामुळे अशा प्रकारच्या कृतीमुळे कायदा व सुव्यवस्थेवरही विपरीत परिणाम होण्याची शक्यता आहे.’’
डॉ. स्तुतीच्या आत्महत्येला ‘लव्ह-जिहाद’चा रंग देण्याचा प्रयत्न
स्तुतीच्या आत्महत्येनंतर सोशल मीडियावर धार्मिक रंग देण्याचा प्रयत्न होत आहे. या संदर्भात बजरंग सोनवणे यानी म्हंटले आहे की, ज्या पुढाऱ्यांनी अथवा कार्यकर्त्यांनी अनाहूतपणे या संदर्भात एखादा चुकीचा संदेश सोशल मिडियावर प्रसारीत केला असल्यास त्यांनी तो त्वरीत मागे घ्यावा, तो संदेश सुधारावा. या आत्महत्येबाबत पोलिसांना कसून तपासणी करता यावी यासाठी जात, धर्म, वर्ग अथवा पंथाला गृहित धरुन अपप्रचार अथवा स्वार्थी व्यवहार होऊ नये याबाबत सर्वांनी सतर्क रहावे.
स्तुती सोनवणेच्या निकटवर्तीयांकडून कळलेली माहिती अशी की, डॉ. स्तुती सोनवणे आत्महत्या प्रकरणाला काही राजकीय संघटनांकडून उगीचच ‘लव्ह जिहाद’चा रंग देण्याचा प्रयत्न केला जात आहे. स्तुतीची आत्महत्या झाल्यानंतर काही तासांतच राजकीय पक्षांच्या आणि सघटनांच्या कार्यकर्त्यांनी या प्रकरणाला हिंदू-मुस्लिम रंग देण्याचा प्रयत्न सुरू केला आणि सोशल मीडियावर त्याचपद्धतीने वातावरण दुषित करण्याचे प्रयत्न केल आणि याचाच तिच्या कुटुंबाला अधिक मानसिक त्रास झाला.
अँटॉप हिल पोलिस ठाण्याचे वरिष्ठ पोलिस निरीक्षक शिवाजी पावडे यांनी याबाबत माहिती देताना सांगितलं की, निर्मलनगर सोसायटीत स्तुती सोनवणे हिने आत्महत्या केली. या प्रकरणी आम्ही अपमृत्यूची नोंद केली आहे. तिच्या घरी सुसाइड नोट सापडली यात तिने आपला प्रियकर फौझील खानसोबतच्या नात्याचा प्रवास आणि त्यातून मिळालेल्या वेदनांचा पाढाच वाचला आहे. फैजल मोहम्मद खानकडून सतत मानसिक छळ होत असल्याचा चिठ्ठीत उल्लेख आहे. फजल मोहम्मद खान (31) याला या प्रकरणी अटक केली असून न्यायालयाने पोलिस कोठडी सुनावली आहे. सोशल मीडियावर त्यांची ओळख झाली होती, २०२४ मध्ये मैत्रीचे रुपांतर प्रेमात झाले. प्रियकराच्या अपमानास्पद वागणुकीमुळे मानसिक ताण वाढल्यानं आपण आत्महत्या करत असल्याचं स्तुतीने म्हटलं आहे. मृत्यूपूर्वी लिहिलेल्या स्तुतीने तिचा प्रियकर फुजैल खान याचा उल्लेख करत त्यांच्या नात्यातील अनेक प्रसंग आणि शेवटच्या काळात झालेल्या वादांचा उल्लेख केला आहे.
