राख झाडत जगणाऱ्या 40 मसणजोगी बायका | दुर्लक्षित वास्तव

स्मशानभूमीच्या आत पाय ठेवण्याआधी लहानपणापासून कानावर पडलेल्या प्रत्येक धारणा आठवू लागतात. स्त्रिया स्मशानात जात नाहीत, त्या अधिक संवेदनशील असतात, नकारात्मक ऊर्जा सहन करू शकत नाहीत अशा असंख्य गोष्टी समाजाने पिढ्यान्‌पिढ्या मनात ठसवल्या आहेत. मृत्यू, दुःख आणि अंत्यसंस्कारांचं वातावरण महिलांसाठी असह्य असतं, असा समज आजही घट्ट रुजलेला आहे. अंत्ययात्रेत सहभागी होणं महिलांसाठी अत्यंत क्लेशदायक ठरतं, त्यामुळे त्यांना स्मशानभूमीपासून दूर ठेवलं जातं आणि हीच गोष्ट ‘परंपरा’ म्हणून स्वीकारली जाते. मात्र प्रत्यक्ष स्मशानभूमीत पाऊल टाकल्यानंतर आणि येथे काम करणारा बायकासोबत काही तास घालवल्यानंतर या सगळ्या समजुती हळूहळू कोसळू लागतात. ज्या ठिकाणी इतरांना भीती, नकारात्मकता आणि असह्य दुःख दिसतं, तिथे काही स्त्रिया दररोज काम करत आहेत, जगत आहेत आणि राखेतूनही स्वतःची स्वप्नं घडवत आहेत.