- अमरावती एमआयडीसीत फॅक्टरीला भीषण आग
- बंद शटरमुळे कामगार महिलेचा मृत्यू
- पतीसमोरच पत्नीचा आगीत होरपळून अंत
अमरावती येथील एमआयडीसी परिसरातील एका टर्पेंटाईन फॅक्टरीमध्ये मंगळवारी सकाळी लागलेल्या आगीत २९ वर्षीय कामगार महिलेचा दुर्दैवी मृत्यू झाला. कामाच्या वेळी बाहेर पडण्याचे शटर बंद असल्याने संबंधित महिलेला बाहेर पडता आले नाही, अशी प्राथमिक माहिती समोर आली आहे. मोनाली सुनील कोडापे असे मृत महिलेचे नाव आहे.
नेमकी घटना काय?
मंगळवारी सकाळी फॅक्टरीमध्ये टर्पेंटाईनच्या बाटल्या भरण्याचे काम सुरू असताना अचानक आग लागली. टर्पेंटाईन ज्वलनशील असल्याने आगीचा भडका उडाला आणि सगळीकडे धूर पसरला. या युनिटमध्ये काम करणाऱ्या इतर सहा महिला कामगार एका बाजूने बाहेर पडण्यात यशस्वी झाल्या. मात्र, मोनाली ज्या भागात काम करत होती, त्या बाजूचे शटर बंद असल्याने ती आगीच्या विळख्यात अडकली.
घटनास्थळी उपस्थित असलेल्या प्रतिभा राऊत यांनी दिलेल्या माहितीनुसार, आग लागल्यानंतर इतर कामगार बाहेर पळाले, परंतु मोनाली असलेल्या बाजूचे शटर बंद होते. आगीची तीव्रता जास्त असल्याने तिला मदत करणे किंवा बाहेर काढणे इतर सहकाऱ्यांना शक्य झाले नाही.
१५ दिवसांपूर्वीच आले होते कामावर…
मोनाली आणि तिचे पती सुनील कोडापे हे मूळचे वर्ध्याचे रहिवासी होते. केवळ १५ दिवसांपूर्वीच हे दाम्पत्य रोजगारासाठी अमरावतीत आले होते. पती सुनील हे देखील याच फॅक्टरीत दुसऱ्या विभागात कार्यरत होते. आग लागल्याचे समजताच त्यांनी पत्नीला वाचवण्याचा प्रयत्न केला, परंतु आगीच्या तीव्रतेमुळे ते तिच्यापर्यंत पोहोचू शकले नाहीत.
सुरक्षा यंत्रणेवर प्रश्नचिन्ह
या दुर्घटनेनंतर फॅक्टरी प्रशासनाच्या हलगर्जीपणावर प्रश्न उपस्थित केले जात आहेत.
टर्पेंटाईनसारख्या ज्वलनशील पदार्थांचे काम सुरू असताना सुरक्षिततेची पुरेशी साधने उपलब्ध होती का?
काम सुरू असताना आणि आपत्कालीन परिस्थिती उद्भवू शकते हे माहित असताना, बाहेर पडण्याचे शटर बंद का ठेवण्यात आले होते?
सध्या स्थानिक प्रशासन आणि पोलीस या प्रकरणाचा अधिक तपास करत असून आगीचे नेमके कारण शोधले जात आहे.
