बिहारच्या राजकारणात आणि देशभरात मोठा वाद निर्माण करणारी एक धक्कादायक घटना समोर आली आहे. पाटणा येथे आयोजित करण्यात आलेल्या नवनियुक्त डॉक्टरांच्या नियुक्तीपत्र वाटप कार्यक्रमात बिहारचे मुख्यमंत्री नितीश कुमार यांनी एका महिला डॉक्टरचा सार्वजनिकपणे हिजाब हटवल्याचा आरोप होत आहे. या घटनेत संबंधित महिला डॉक्टर नुसरत परवीन यांना तीव्र मानसिक धक्का बसला असून त्यांनी बिहार सोडून थेट कोलकाता गाठल्याची माहिती समोर आली आहे. विशेष म्हणजे, ज्या सरकारी नोकरीसाठी त्यांनी वर्षानुवर्षे मेहनत घेतली होती, ती नोकरी स्वीकारण्यासही त्यांनी नकार दिला आहे.

नियुक्तीपत्र कार्यक्रमात नेमकं काय घडलं?

15 डिसेंबर रोजी पाटणा येथे राज्य सरकारतर्फे नवनियुक्त आयुष डॉक्टरांसाठी नियुक्तीपत्र वाटपाचा कार्यक्रम आयोजित करण्यात आला होता. या कार्यक्रमात मुख्यमंत्री नितीश कुमार स्वतः उपस्थित होते. या वेळी नुसरत परवीन या डॉक्टर नियुक्तीपत्र घेण्यासाठी मंचावर आल्या. त्या हिजाब परिधान करून आल्या होत्या. आरोपानुसार, मुख्यमंत्री नितीश कुमार यांनी नाराजी व्यक्त करत ‘हे काय आहे?’ असा सवाल केला आणि त्यानंतर त्यांच्या चेहऱ्यावरील हिजाब स्वतःच्या हाताने हटवला. ही घटना मंचावर उपस्थित अनेक लोकांसमोर घडली. काही लोक हसत असल्याचेही व्हिडिओमध्ये दिसत असल्याचा दावा करण्यात येत आहे. घटनेनंतर काही वेळातच अधिकाऱ्यांनी नुसरत परवीन यांना बाजूला नेले.

सोशल मीडियावर संताप, राजकीय टीका.. 

या घटनेचा व्हिडिओ सोशल मीडियावर व्हायरल झाल्यानंतर देशभरातून संतप्त प्रतिक्रिया उमटू लागल्या. विरोधी पक्ष असलेल्या राष्ट्रीय जनता दल (RJD), काँग्रेस, AIMIM यांसह अनेक नेत्यांनी मुख्यमंत्री नितीश कुमार यांच्या कृतीवर तीव्र टीका केली आहे. ही कृती महिलांचा अपमान करणारी असून धार्मिक स्वातंत्र्यावर घाला असल्याचा आरोप करण्यात येत आहे. सोशल मीडियावर #HijabControversy, #NitishKumar, #JusticeForNusrat असे हॅशटॅग ट्रेंड होऊ लागले आहेत. अनेक नेटकऱ्यांनी मुख्यमंत्र्यांनी सार्वजनिक माफी मागावी अशी मागणी केली आहे.

या घटनेननंतर महिलेने बिहार सोडले... 

घटनेनंतर डॉक्टर नुसरत परवीन यांनी बिहार सोडण्याचा निर्णय घेतला असून त्या कोलकाता येथील आपल्या घरी परतल्या आहेत. त्यांनी माध्यमांशी संवाद साधताना आपल्या मनातील भावना व्यक्त केल्या. “मी शाळा आणि कॉलेजमध्ये नेहमीच बुरखा घालून शिक्षण घेतलं आहे. माझ्यासाठी बुरखा हा केवळ कपडा नाही, तर माझ्या संस्कृतीचा अविभाज्य भाग आहे. त्या कार्यक्रमात इतक्या लोकांसमोर माझा अपमान झाला. काही लोक हसत होते, ते मला खूप वेदनादायक वाटलं,” असे त्या म्हणाल्या. “मी खूप मेहनतीने इथपर्यंत पोहोचले होते. आई-वडिलांना मदत करण्याचं स्वप्न होतं. पण आता बिहारला परत जाण्याची हिंमत माझ्यात उरलेली नाही,” असे सांगत त्यांनी सरकारी नोकरी स्वीकारण्यास नकार दिल्याचे स्पष्ट केले.

आंतरराष्ट्रीय स्तरावरही चर्चा.. 

या प्रकरणाची दखल भारताबाहेरही घेतली जात आहे. पाकिस्तानातील प्रसिद्ध वृत्तपत्र ‘डॉन’ने या घटनेवर सविस्तर वृत्त दिले आहे. डॉनच्या वृत्तानुसार, नुसरत परवीन काही बोलण्याआधीच मुख्यमंत्री नितीश कुमार यांनी तिचा हिजाब हटवला, असे नमूद करण्यात आले आहे. याशिवाय पाकिस्तान मानवाधिकार परिषदेने या घटनेचा तीव्र निषेध केला आहे. त्यांनी ही कृती मानवी प्रतिष्ठा, धार्मिक स्वातंत्र्य आणि महिलांच्या वैयक्तिक स्वायत्ततेवर हल्ला असल्याचे म्हटले आहे. भारत सरकारकडे निष्पक्ष चौकशी करण्याची मागणीही त्यांनी केली आहे.

मानवाधिकारांचा मुद्दा ऐरणीवर..

मानवाधिकार संघटनांनी या प्रकरणात हस्तक्षेप करत पीडित महिला डॉक्टरची अधिकृत माफी मागण्याची मागणी केली आहे. तसेच भविष्यात अशा घटना टाळण्यासाठी ठोस कायदेशीर उपाययोजना करण्याची गरज व्यक्त केली आहे. दरम्यान, बिहार सरकार किंवा मुख्यमंत्री नितीश कुमार यांच्याकडून या घटनेबाबत अद्याप ठोस स्पष्टीकरण आलेले नाही. मात्र या प्रकरणामुळे नितीश कुमार यांच्या अडचणी वाढण्याची शक्यता व्यक्त केली जात आहे. महिला सुरक्षा, धार्मिक स्वातंत्र्य आणि सार्वजनिक वर्तन या मुद्द्यांवरून हा वाद आणखी पेटण्याची चिन्हे आहेत.