प्रसिद्ध मॉडेल आणि मिस डार्क क्वीन तामिळनाडू 2019 चा किताब जिंकणाऱ्या सॅन रेचेल यांनी आत्महत्या केल्याची धक्कादायक बातमी समोर आली आहे. 26  वर्षांच्या रेचेल यांना 'रंगभेदाविरोधी आणि बॉडी पॉझिटिव्हिटी'च्या मोहिमेसाठी ओळखलं जायचं. त्या पुदुचेरीमधील राहत्या घरी बेशुद्ध सापडल्या. प्राथमिक तपासणीनुसार, त्यांनी झोपेच्या गोळ्यांचे ओव्हरडोज घेतल्याचं स्पष्ट झालं आहे. ही घटना 5 ते 6 जुलै 2025च्या सुमारास घडली, मात्र सॅन रेचेल यांचा मृत्यू 12 जुलै रोजी JIPMER हॉस्पिटलमध्ये उपचारांदरम्यान झाला. सुरुवातीला त्यांना  पुदुचेरी गव्हर्नमेंट हॉस्पिटलमध्ये दाखल करण्यात आलं होतं. नंतर त्यांना खाजगी हॉस्पिटलमध्ये नेण्यात आलं आणि शेवटी JIPMER मध्ये दाखल करण्यात आलं.

पोलिसांच्या प्राथमिक तपासातून असे स्पष्ट झाले आहे की, रेचेल या आर्थिक अडचणीत आणि मानसिक तणावाखाली होत्या. तिच्यावर काही फॅशन इव्हेंट्सच्या आयोजनासाठी घेतलेलं कर्ज असल्याचं सांगितलंजात आहे. तीसतत स्वतःचा ब्रँड तयार करण्याच्या प्रयत्नात होती. आणि त्यामुळे पैशांमुळे नेहमीच असायची  असे ही समोर आले आहे. 

सॅन रेचेलने काळ्या रंगाच्या सौंदर्याचं खुलेपणानं समर्थन केलं... 

सॅन रेचेल यांची ओळख फक्त मॉडेल म्हणूनच नव्हे, तर एक वैचारिक कार्यकर्ता म्हणून होती. तिने सौंदर्याच्या पारंपरिक संकल्पनांना आव्हान देत काळ्या रंगाच्या सौंदर्याचं खुलेपणानं समर्थन केलं होतं. 'Miss World Black Beauty 2023' मध्ये त्यांनी भारताचं प्रतिनिधित्व केलं होतं आणि अनेकांनी यांची  तुलना सामाजिक बदल घडवणाऱ्या कलाकारांशी केली होती. सॅन रेचेल यांनी लंडन, जर्मनी आणि फ्रान्ससारख्या देशांमध्ये झालेल्या मॉडेलिंग स्पर्धांमध्ये सहभाग घेतला आणि भारताचं नाव आंतरराष्ट्रीय स्तरावर उज्ज्वल केलं.  त्या महिलांच्या सुरक्षिततेसाठी जनजागृती करत असत आणि अनेक मोहिमांमध्ये सक्रिय सहभाग घेत. 

त्यांच्या मृत्यूने अनेकांना धक्का बसला आहे. अनेक मॉडेल्स, कलाकार आणि चाहत्यांनी सोशल मीडियावर त्यांना श्रद्धांजली वाहिली. अनेकांनी हे लक्षात आणून दिलं की, यशाच्या झगमगाटामागे अनेकदा मानसिक आरोग्याचं मोठं ओझं दडलेलं असतं. बॉडी शेमिंग, रंगभेद, आर्थिक संघर्ष आणि प्रसिद्धीच्या दबावामुळे मानसिक संतुलन बिघडतं, आणि सॅन रेचेल यांचा मृत्यू हीच गोष्ट अधोरेखित करते. 

पोलिसांनी आत्महत्येचा गुन्हा नोंदवला असून, अधिक तपास सुरू आहे. घरातील परिस्थिती, आर्थिक व्यवहार, आणि रुग्णालयातून निघाल्यानंतर काय घडलं, यासंबंधी सखोल चौकशी केली जात आहे. त्यांच्या आत्महत्येमागे इतर कोणतीही जबाबदारी आहे का, हे देखील तपासलं जात आहे.

सॅन रेचेल यांची ही दुखःद कहाणी फक्त एका मॉडेलचा शेवट नाही, तर मानसिक आरोग्य, समाजातील सौंदर्याची अपुरी व्याख्या, आणि एकटेपणाची असहाय्यता यांचं वास्तव दर्शन आहे.