'जादू परी' म्हणून साऱ्या विश्वात ओळखली जाणारी आणि बागेश्वर धाम येथील मठाधिपती धीरेंद्र शास्त्री यांचा चमत्कार खोडून काढणारी भारताची सुहानी शाह पुन्हा एकदा यशाच्या शिखरावर पोहचली आहे. जादूच्या विश्वात सर्वात प्रतिष्ठित म्हणून ओळखल्या जाणाऱ्या वर्ल्ड चैंपियनशिप ऑफ मॅजिक (FISM) स्पर्धेत सुहानी शाहने ‘बेस्ट मॅजिक क्रिएटर’ हा सर्वोच्च पुरस्कार जिंकला आहे. इटली येथे झालेल्या या स्पर्धेत सर्वोत्कृष्ट जादूगाराचा किताब जिंकल्यामुळे या क्षेत्रात सोनाली शाहच्या निमित्ताने भारताचा दबदबा वाढला आहे.
भारताच्या 'जादू परी'ला जागतिक मॅजिक स्पर्धेत सर्वोच्च किताब
FISM ही श्रेणी पहिल्यांदाच या वर्ल्ड चैंपियनशिप ऑफ मैजिक स्पर्धेत समाविष्ट करण्यात आली असून ज्या कलाकारांनी डीजिटल मीडियावर जादू कलेचा विस्तार केला आहे अशांना या किताबाने सन्मानित करण्यात येते. जेसन लाडान्ये आणि मोहम्मद इमानी सारख्या तिग्गज आंतरराष्ट्रीय कलाकारांना मागे टाकत सुहानीने हे यश प्राप्त केले आहे. हा किताब जिंकल्यानंतर सुहानीने आपल्या सोशल मीडियावर प्रतिक्रिया व्यक्त करताना म्हटलं की, ‘’करून दाखवलं मित्रांनो… आपण जिंकलो! एका जादूगाराला मिळाला सर्वोच्च किताब, धन्यवाद…!
सोनाली शाह प्रामुख्याने ओळखली जाते ती ‘माईंड रीडर’मुळे… सुहानी स्वत:ला माईंड रीडरसह कॉर्पोरेट ट्रेनर, लाइफ कोच आणि हिप्नोथेरेपिस्ट असल्याचं म्हणते. तिने माईंड रिडिंगवर पाच पुस्तकंही लिहिली आहेत.
संबंधित लेख वाचा: 1) बागेश्वर बाबांच्या घटनाविरोधी अशास्त्रीय दाव्यांविरोधात कायदेशीर कारवाईची मागणी |
पहिलीपर्यंत शिक्षण, वयाच्या 7 व्या वर्षी पहिला शो…
'जादू परी' म्हणून ओळखली जाणारी सुहानी 25 वर्षांपासून मॅजिक शो करते आहे. 29 जानेवारी 1990 मध्ये सुहानीचा राजस्थानमधील उदयपूरमध्ये जन्म झाला. तिने 22 ऑक्टोबर 1997 रोजी अहमदाबादमध्ये पहिला शो केला होता. त्यावेळी ती सात वर्षांची होती. ऑल इंडिया मॅजिक असोसिएशनने तिला 'जादू परी' अशी उपाधी दिली आहे. तिने जगभरात अनेक ठिकाणी मॅजिक शो केले आहेत. त्याशिवाय ती माईंड रिडरचं ट्रेनिंगही देते. तिने सर्वात आधी तिच्या वडिलांकडून माईंड रीडींग शिकल्याचं सांगितलं.
सुहानी शाहने एका मुलाखतीत सांगतिलं, की तिने इयत्ता पहिलीपर्यंतच शिक्षण घेतलं आहे. पहिलीनंतर तिने शाळेत जाणं बंद केलं. त्यानंतर लहानपणापासूनच तिने आपलं पॅशन फॉलो केलं आहे.
सुहानी सोशल मीडियावर अतिशय अॅक्टिव्ह आहे. तिने 21 ऑक्टोबर 2007 रोजी तिचं यूट्यूब चॅनेल सुरू केलं होतं. तिचे सोशल मीडिया इन्स्टाग्रामवर 10 लाखहून अधिक फॉलोअर्स आहेत. तिने आतापर्यंत जाकिर खान, करीना कपूर, सायना नेहवाल, संदीप महेश्वरी अशा अनेक पॉप्युलर सेलिब्रिटींसह शो केले आहेत.
सुहानी शाहचे ‘मेंटॅलिझम’ म्हणजे काय?
सुहानी शाह सांगते, “जादूचे अनेक प्रकार असतात. त्यातलाच एक प्रकार मेंटॅलिझम आहे. मी 32 वर्षांची आहे आणि 7 वर्षांची असल्यापासून जादूचे खेळ करतेय. 10 वर्षांपासून मेंटॅलिझम करतेय. मेंटॅलिझममध्ये अनेक टेक्निक असतात. समोरच्याच्या डोळ्यांची मुव्हमेंट, हावभाव, बोलायची पद्धत, यावरून समोरच्याशी संबधित गोष्टी जाणून घेतल्या जाऊ शकतात.आपल्याजवळ असलेली ही देण एक कला व ट्रिक असल्याचे ती सांगते. मी सराव करुन तिला अधिक विकसित केले आहे. ही कला आपण कोणालाही शिकवण्यास तयार असल्याचे तिने स्पष्ट केले.
धीरेंद्र शास्त्री आणि सुहानी शाह यांच्यात काय साम्य आहे?
बागेश्वर धाम येथील मठाधिपती धीरेंद्र शास्त्री उर्फ बागेश्वर बाबा कायम चर्चेत असतात. लोकांच्या मनात काय सुरु आहे, हे ते ओळखत असल्याचा दावा करतात. त्यांना लोकांच्या समस्या न सांगताच समजतात. त्या समस्यांचे उत्तर ते कागदावर लिहून देतात. त्यामुळे त्यांचा दरबारात देशभरातून अनेक जण येत आहेत. बागेश्वर धामच्या दाव्यावर मोठी चर्चा सध्या सुरु आहे. मुंबईच्या सुहानी शाहने बागेश्वर धामच्या ‘मन की बात’चे रहस्य एका वृत्तवाहिनीच्या शोमधून उलगडले. ‘मन की बात’ ओळखणे ही अद्दश्य शक्ती आहे की ट्रिक हे तिने प्रत्यक्ष लाईव्ह करुन दाखवले.
बागेश्वर धाम लोकांचे मन कसे समजून घेतात. हजारो लोक बाबांच्या दरबारात केवळ करिअर आणि भविष्याशी संबंधित समस्या घेऊनच येत नाहीत तर त्यांच्या आजारांवर उपचार करण्यासाठीही येतात.पण बाबा खरेच असाध्य रोग बरे करू शकतात का? हे विज्ञानाला आव्हान नाही का? या सर्व प्रश्नांची थेट चाचणी लाईव्ह शोमधून घेण्यात आली.
माइंड रीडर सुहानी शाहने या शो दरम्यान, प्रेक्षकांसोबत थेट चाचण्या केल्या. शोमध्ये मनात आलेल्या प्रत्येक व्यक्तीचा विचार त्या एका पाटीवर लिहून ठेवत होत्या. मग त्या व्यक्तीला त्याने काय विचार केला होतो, ते विचारुन पाटीवरील उत्तर दाखवत होते. दोन्ही गोष्टी अगदी सेम टू सेम येत होत्या.
धीरेंद्र शास्त्री चमत्कारी नाहीत, ती एक कला आहे - सुहानी
सुहानी शाहला या शो दरम्यान एका मुलीच्या मनाची गोष्ट कळली. तिने एका मुलीला कागदावर काहीतरी लिहायला सांगितले. यानंतर सुहानीने मुलीला तिने लिहिलेल्या शब्दांचा विचार करण्यास सांगितले. यानंतर सुहानीने मुलीला सांगितले की, तुझ्या आजीची तब्येत ठीक नाही आणि तू हेच लिहिले आहेस. काळजी करू नका. अर्थात सुहानीचे उत्तर बरोबर आले.
बागेश्वर बाबाच्या चमत्काराबद्दल सुहानी म्हणते की, “सनातन धर्म म्हणतो की खरं बोललं पाहिजे. त्यामुळे जर कोणी खोटं बोलत असेल तर हे चूक आहे.
हनुमान आपल्या सगळ्यांचे देव आहेत आणि आपल्या सर्वांवर त्यांची कृपा आहे पण धीरेंद्र जर कोणाच्या मनातलं देवाच्या कृपेने अचूक ओळखण्याचा दावा करत असतील तर हे चूक आहे. हा एक जादूचा खेळ आहे आणि याला खेळच म्हटलं पाहिजे. तुम्ही माझे व्हीडिओ पाहिले असतील तर धीरेंद्र करतात त्यापेक्षा कितीतरी पुढच्या गोष्टी आम्ही करतो हे कळेल. ज्याला आम्ही कला म्हणतो त्याला धीरेंद्र चमत्कार म्हणतात.”
ऑस्ट्रेलयिन न्यूज शो मध्ये सगळ्यांना आश्चर्यचकीत केले
अलीकडेच भारतीय मानसशास्त्रज्ञ आणि माइंड रिडर सुहानी शाहने एका ऑस्ट्रेलियन टीव्ही शोमध्ये हजेरी लावली. यावेळी तिची कामगिरी पाहून सर्वजण आश्चर्यचकित झाले. सुहानी शाहने ऑस्ट्रेलयिन न्यूज शो 'द प्रोजेक्ट' मध्ये उपस्थित राहत होस्टच्या क्रशच्या नावाचा योग्य अंदाज लावला. इतकंच नाही तर तिने दुसऱ्या एका व्यक्तीच्या मनातील पासवर्ड ओळखत त्याचा आयफोन अनलॉक केला.
सुहानीने फक्त दोन मिनिटात सर्वांच्या मनातील उत्तर ओळखलं आणि सर्वांना आश्चर्यचकित केलं. तिचा व्हिडीओ सोशल मीडियावर व्हायरल झाला आहे.
इंस्टाग्रामवर कार्यक्रमातील एक सेगमेंट शेअर करण्यात आलं आहे, ज्यामध्ये सुहानी अँकरला तिच्या क्रशबद्दल विचार करण्यास सांगते. "तू एखाद्या अशा व्यक्तीचा विचार कर जो कुटुंबीय किंवा तुझा होणारा नवरा नाही. अशी एखादी व्यक्ती ज्याला तू आदर्श मानते," असं सुहानी जॉर्जीला सांगते. यावेळी ती तिला मला हे नाव माहिती असण्याची काही शक्यता आहे का? असं विचारते. त्यावर जॉर्डी अशक्य असं उत्तर देते.
यानंतर खेळ सुरु होताच सुहानी जॉर्जीला डोळे मिटून त्या व्यक्तीच्या नावाचा विचार करण्यास सांगते. तुझ्या मनात आता दोन शब्द आहेत असं काही वेळाने ती सांगते, ज्याला जॉर्जी दुजोरा देते. यानंतर सुहाना आपण फक्त पहिल्या नावावर लक्ष केंद्रीत करुयात असं सांगते.
"कल्पना कर की तू या व्यक्तीला भेटत आहेस, त्याच्याकडे जात आहेस आणि हस्तांदोलन करत आहेत. ही एक अतिशय तीव्र ऊर्जा आहे, खूप तीव्र, एक पुरुषी व्यक्तिमत्व आहे," असं सुहानी सांगते. "तुला या व्यक्तीबद्दल काय आवडते हे सांगू शकशील का?" असं ती विचारते. "तुम्हाला ही व्यक्ती आवडते कारण ती एक अतिशय सुरक्षित, संरक्षक भावना आहे," असंही ती सांगते.
यानंतर सुहानी एक कोरा कागद घेते आणि त्यावर नाव लिहिते. ती जॉर्जीला पहिल्या अक्षराबद्दल विचार करण्यास सांगते. S अक्षर आहे सांगताच जॉर्जी दुजोरा देते. त्यानंतर ती अँकरला पुन्हा डोळे बंद करण्यास सांगते आणि कागदावर लिहिते. त्यानंतर, ती इतर पॅनेल सदस्यांना लिहिलेले नाव दाखवते, दुसरीकडे जॉर्डी तिच्या मनात असलेले नाव "जेसन स्टॅथम" उघड करते. कागदावर तेच नाव लिहिलेलं पाहून सर्वजण आश्चर्यचकित होतात.
सुहाना एवढ्यावरच थांबत नाही. ती दुसऱ्या होस्टला एका नंबरचा विचार करण्यास सांगते. काही वेळाने ती त्याचा फोन अनलॉक करते ज्यामुळे सर्वजण आश्चर्यचकित होतात. हा व्हिडीओ सोशल मीडियावर व्हायरल झाला आहे.
