शंतनू खुजे

नाशिकच्या हिरावाडी परिसरातून एक धक्कादायक घटना समोर आली आहे. चारित्र्यावर संशय आणि मानसिक त्रासाला कंटाळून नवविवाहितेने विषप्राशन करून आत्महत्या केली. सासरचे लोक वारंवार चारित्र्यावर संशय घेत असल्याने नेहा पवार या नवविवाहितेने लग्नानंतर अवघ्या 6 महिन्यातच जीवन संपवलं. आत्महत्येपूर्वी तिने पोलीस आणि तिच्या भावाच्या नावाने 7 पानांची सुसाईड नोट लिहली. या सुसाईड नोटचा आधार घेत नाशिकच्या पंचवटी पोलीस ठाण्यात गुन्हा दाखल करण्यात आला आहे. 

7 पानांच्या या सुसाईड नोटमध्ये नेहाने अनेक धक्कादायक आरोप केले आहेत. लग्न झाल्यानंतर नवऱ्याने शारिरीक संबंधानंतर सील ब्लड निघाले नाही, म्हणून 15-20 दिवस संशय घेतला. मात्र नंतर सील ब्लड निघाल्यानंतर तो शांत बसला, असा उल्लेख नेहाने सुसाईट नोटमध्ये केला आहे. 6 सप्टेंबर 2025 रोजी मला मासिक पाली आली होती. पण मी खोटं बोलत असल्याचा संशय माझ्या सासूला आला, म्हणून माझ्या नंदेने मी पॅड लावले की नाही हे तपासले. इतकेच नव्हे तर माझ्या नवऱ्याने देखील पाळीबद्दल विचारणा केल्याचं नेहाने सुसाईड नोटमध्ये लिहिलं आहे.

सुसाईड नोटमध्ये काय काय…?

‘माझे नाव नेहा बापू डावरे उर्फ नेहा संतोष पवार असून, माझे लग्न 4 जून 2025 रोजी रेशीमबंध बँक्वेट हॉलमध्ये झाले. 10 मार्चला सुपारी फोडल्यावेळी माझ्या सासरच्यांनी म्हटले की, हुंडाप्रथा बंद आहे. तरी तुम्ही नवरदेवास त्याच्या अटी-शर्तीनुसार सोने, चांदी, पाच भांडे द्या. त्यानुसार माझ्या माहेरच्यांनी धुमधडाक्यात लग्न लावून दिले. लग्नानंतर सासरचे भांडण करीत नाही पण, मानसिक त्रास देतात.’ असे तिने चिठ्ठीत लिहिले आहे. ‘सारखी मोबाइलवर बोलते, घरकाम येत नाही, पतीशी उलटसुलट बोलते. गॅस सिलिंडर एक महिन्यातच संपते. पतीचे लग्नाआधीपासून एका युवतीसोबत प्रेमसंबंध असून, पतीने तिला दोघांचे अश्लील फोटो दाखवले होते. सासरची आर्थिक परिस्थिती नाजूक असल्याने आणि सासरचे लोक पैशांची मागणी करू लागल्याने माहेरहून 20 हजार रुपये आणून दिले.

दिवाळीसाठी 15 दिवस माहेरी पाठवले. मात्र,दहाव्या दिवशी सासू व पतीने सासरी येण्यास सांगितले. नियमित मासिक पाळी येत नसल्याने सासरच्या लोकांनी त्रास दिला. भाऊ सासरच्या लोकांना मी लिहिलेली चिठ्ठी सापडली तर ते गायब करतील, म्हणून चिठ्ठीचे फोटो काढून सगळ्यांना पाठवत आहे. माझे नशीब खराब असून, मला सासर चांगले मिळाले नाही. म्हणून मी आत्महत्या करीत आहे’, असे तिने चिठ्ठीत लिहिले आहे.

नवऱ्याकडून अनेकदा शिविगाळ 

एक नणंद माहेरी येऊन बसली आहे. तिच्यासह तिच्या मुलांचंही मलाच करावं लागतं, नंणंदा, नवरा, सासूचे कान भरतात, त्यावरुन मग घरात मानसिक छळ केला जात असल्याचंही तिने नोटमध्ये लिहिलं आहे. ती काहीच काम करत नाही, सतत मोबईलवर असते, माहेरच्यांशी सारखी गप्पा मारत असते असे कान भरतात. माझ्या सासरच्यांनी माझी फसवणूक केली. 15 लाख रुपये देऊन माझ्या भावाने लग्न लावलं, माझ्या नवऱ्याची परिस्थिती खराब आहे असं दाखवण्यात आलं, म्हणून मी माझ्या माहेरातून 20 हजार रुपये मदत आणून दिली. ते दिले नसते तर त्यांनी अजून छळ केला असता अशी भीती सतत मनात होती. माझ्या घरच्यांनाही माझ्याविरोधात भडकवण्यात आलं. नांदायला आल्यापासून नवऱ्याने दोन वेळा मारलं, अनेकदा आईवरुन शिवीगाळ केली. इतकंच नाही तर माहेरी तु कोणी यार ठेवला असेल असं बोलून सतत चारित्र्यावर संशय घेत होता असंही या नवविवाहितेनं या नोटमध्ये म्हटलं आहे. 

मानसिक तणावातून विवाहित महिलांच्या आत्महत्यांमधे वाढ 

गेल्या काही दिवसांमध्ये सासरच्या मानसिक त्रासाला आणि छळाला कंटाळून अनेक विवाहित महिलांना आत्महत्या केल्याच्या घटना समोर आल्या आहे. काही दिवसांपूर्वी भारतीय जनता पक्षाच्या नेत्या आणि माजी मंत्री पंकजा मुंडे यांचे स्वीय सहाय्यक अनंत गर्जे यांच्या पत्नी डॉक्टर गौरी पालवे-गर्जे यांनी मुंबईत आत्महत्या केल्याचा प्रकार समोर आला होता. या प्रकारानंतर ही आत्महत्या नसून हत्या असल्याचा आरोप गौरी यांच्या घरच्यांनी केला होता. अनंत गर्जेचे विवाहबाह्य संबंध असल्यानं गौरी अस्वस्थ होत्या. मग याच तणावातून गौरी यांनी आत्महत्या केली. 

आत्महत्येमागे कौमार्य चाचणीचं मुख्य कारण असल्याचा अंनिसला संशय

आत्महत्येतची अनेक कारणे सांगितली असली तरी सदर महिलेची कौमार्य चाचणी घेतले गेली हे मुख्य कारण आहे असा संशय अंधश्रद्धा निर्मूलन समितीला आहे. सदर महिलेला मासिक पाळीबद्दल समस्या होत्या.शरीरसंबध करतेवेळी रक्तस्त्राव झाला नाही म्हणून नवर्‍याने तिच्यावर चारित्र्यचा संशय घेतला व तिला त्रास देणे सुरु केले. काही दिवसानंतर तिला मासिक पाळी आली असता तिच्या सासुच्या सांगण्यावरुन नणंदेने सॅनेटरी पॅड लावून तपासले होते. इतकेच नव्हे तर तिच्या नवर्‍याने स्वतःचे बनियान फाडून रक्तस्त्राव होत आहे का तेही तपासले. सदरचा सर्व तपशिल आत्महत्येपुर्वी पिडीतेने लिहीलेल्या चिठ्ठीत आलेला आहे. त्यामुळे सदर महिलेची कौमार्य चाचणी व चारित्र्याचा संशय यामुळे तिचे खच्चीकरण झाल्याचे व तेथुनच तिला मानसिक व शारीरिक त्रास झाल्याचा संशय अंनिसने व्यक्त केला आहे.

आरोपीविरूध्द जादूटोणाविरोधी कायद्याचे कलम लावा… 

सदर महिलेवर जादुटोणा करण्याचे प्रकार देखील घडलेले आहे. अज्ञात भोंदुबाबाच्या सांगण्यावरुन नागाचा आकार असलेल्या खिळ्याला बिब्बा लावून जादुटोणा करण्याचे फोटो सदर महिलेने प्रसारित केले आहे. शिवाय पायाच्या बोटामध्ये मंथरलेले लोखंडाचे जोडवे घालण्यास भाग पाडले. त्यामुळे संशयित आरोपीविरूध्द सामाजिक बहिष्कार विरोधी कायदा व जादूटोणाविरोधी कायद्याचे कलम लावावेत व त्या भोंदुबाबाला सहआरोपी करावे,अशा मागणीचे निवेदन महाराष्ट्र अंधश्रद्धा निर्मूलन समितीने पंचवटी पोलीस ठाण्याचे वरिष्ठ पोलीस निरीक्षक गजेंद्र पाटील यांना दिले आहे.निवेदनावर अंनिसचे राज्य प्रधान सचिव डॉ.टी.आर. गोराणे,राज्य कार्यवाह कृष्णा चांदगुडे,शहर कार्याध्यक्ष कोमल वर्दे यांच्या स्वाक्षऱ्या आहेत.